Istorgia

Dapi il 1889 en viadi fascinant e different

Cun noss trajects da muntogna singulars, cun il Patrimoni mundial da l’UNESCO, cun il Glacier Express ed il Bernina Express garantin nus dapi il 1889 per aventuras da viafier fascinantas a travers il Grischun. Ins na po betg pli s’imaginar ina da las pli bellas cuntradas da la Svizra senza nossa viafier cun renum mundial. Quai che ha entschavì il 1889 cun l’avertura dal traject da Landquart a Claustra è oz ina rait da lingias da 384 km enamez l’auta muntogna svizra. Integradas armonicamain en la natira selvadia, contribueschan las lingias da viafier e las construcziuns d’art a l’attracziun dal Grischun.

L’onn 1888 han ils piuniers da viafier grischuns realisà lur idea d’ina viafier da muntogna. Sin l’iniziativa da l‘Ollandais Willem-Jan Holsboer han els fundà la viafier a binaris stretgs Landquart-Tavau SA. Anc il medem onn vegn fatga l’emprima badigliada, il 1889 vegn averta la lingia da viafier Landquart – Claustra. Già il 1890 circuleschan ils emprims trens a vapur da Landquart a Tavau. Pli tard suondan ils trajects a San Murezzan, Mustér e Scuol-Tarasp. Grazia a las fusiuns cun la viafier d’Arosa e dal Bernina è creschida la rait da lingias.

Mo 25 onns pli tard era construida quasi l’entira rait da lingias da la Viafier retica. Cun ils onns è la Viafier retica sa sviluppada vinavant, è dentant adina restada fidaivla a ses intent da colliar ils pli bels lieus en las muntognas cun lingias da viafier fascinantas. Il tunnel dal Veraina ha ina lunghezza da 19 042 meters ed è vegnì avert il 1999 sco ultim engrondiment dal traject.

Cronica

1889Avertura dal traject Landquart – Claustra tras la viafier a binaris stretgs Landquart-Tavau (LT)
1890Avertura dal traject Claustra – Tavau
1895La LT sa numna a partir dad ussa «Viafier retica»
1896Avertura dal traject Landquart – Tusaun
1903Avertura dal traject La Punt/Reichenau – Glion
1904Avertura dal traject Tusaun – San Murezzan
1907Avertura dal traject Bellinzona – Mesocco
1908Avertura dal traject Samedan – Puntraschigna
1909Avertura dal traject Tavau – Filisur
1910Avertura dal traject San Murezzan – Tirano (viafier dal Bernina)
1912Cumpra da l’emprima locomotiva electrica; Avertura dal traject Glion - Disentis/Mustér
1913Avertura dal traject Bever – Scuol-Tarasp
1914Avertura dal traject Cuira – Arosa (viafier Cuira – Arosa)
1922Terminaziun electrificaziun da la VR
1930Emprim viadi dal Glacier Express San Murezzan – Zermatt
1942Fusiun da la VR cun la viafier Cuira-Arosa; Fusiun da la VR cun la viafier Bellinzona-Mesocco
1943Fusiun da la VR cun la viafier dal Bernina
1973Introducziun dal Bernina Express
1979Relaziun cun il Hakone-Tozan-Railway (Giapun)
1982Avertura dal tunnel da basa Furca (colliaziun da tut onn Glacier Express)
1989La VR festivescha ses giubileum da 100 onns. Per festivar l’onn survegn la VR ina nova cumparsa ed ils trens èn uss cotschens
1997L’electrificaziun dal traject Cuira - Arosa vegn midada da 2 400V current cuntinuà sin 11 000V current alternant
1999Avertura dal traject Claustra - Lavin/Susch (tunnel dal Vereina cun transport d‘autos) – emprima prolungaziun da traject dapi il 1914
2003Serrada dal traject  Bellinzona – Mesocco
2008Las lingias da l’Alvra e dal Bernina vegnan recepidas en la glista dal patrimoni mundial UNESCO

In sguard retrospectiv: Rumida da la naiv en ils onns enturn 1930