Viafier retica

In curt purtret

Cun circa 1 600 collavuraturas e collavuraturs purschain nus mintg’onn a 12 milliuns passagiers in viadi aventurus tras il Grischun.

Nossa rait da lingias d’ina lunghezza da 385 kilometers fascinescha cun cifras impressiunantas: in terz sa chatta sin passa 1 500 meters sur mar. In terz tutga tar il Patrimoni mundial Viafier retica da l’UNESCO. Ed in tschintgavel sa chatta sin u en construcziuns d’art.

Cun noss trens regiunals e trens da martganzia sco er cun il transport d’autos tras il Vereina procurain nus per chadainas da transport segiras en il chantun Grischun. Cun ils trens panoramics Bernina Express e Glacier Express sco er cun il Patrimoni mundial «Viafier retica en la regiun Alvra/Bernina» da l’UNESCO disponin nus da marcas ch’èn enconuschentas en l’entir mund. Marcas che nus cultivain e posiziunain ensemen cun noss partenaris turistics.

Nus gestiunain ina viafier favuraivla per ils clients ed essan mintga di en viadi - segirs, nets e punctuals. Nus muventain il Grischun e fascinain ils clients da tut il mund. Cun in andament effizient dal traffic, cun vehichels novs e moderns, cun l’engrondiment da nossa purschida e cun products fascinants vulain nus augmentar anc dapli l’aventura «Viafier retica»: cun ferma prestaziun, modernitad e cun caracter evidentamain grischun.

Vollmondfahrt

Nus agin persistentamain, renovain punts e tunnels da 100 onns per il futur, augmentain l’effizienza energetica e duvrain energia renovabla or da forza idraulica. Cun la construcziun nova dal tunnel da l’Alvra ans chattain nus entamez in project dal tschientaner.

Tut quai è dentant be pussaivel grazia al grond engaschament da tut ils 1 600 collavuraturs da la VR. Ensemen cun partenaris ferms dal turissem e da l’economia e cun il grond engaschament da noss proprietaris ed incumbensaders, la confederaziun ed il chantun, per «lur» viafier.

La Viafier retica a 15 minutas