Pertge la Viafier retica?
Perquai che ti effectueschas dapli qua.
Tar la VR daventas ti part d'ina cuminanza. Tar nus s'uneschan la tradiziun ed il progress – dal material rudlant istoric fin a las pli novas tecnologias. Questa cumplexitad e diversitad è a medem temp pretensiusa e fascinanta.
Saja quai en la cabina da la manischunza u dal manischunz, en il biro u or en il terren: Tia lavur quinta. Tar nus chattas ti projects interessants, models da lavur individuals e spazi d'agir creativ – en in ambient, nua ch'ins stima e sustegna in l'autra.
Sco patruna sociala e segira ta purschain nus in ambient fair e cumpetitiv. Pled d'onur grischun.
Tes avantatgs tar la Viafier retica
Buna lavur dovra bunas cundiziuns da basa. Perquai ta purschain nus dapli ch'ina plazza da lavur segira – numnadamain pajas fairas, models flexibels, fermas prestaziuns socialas e blers extras prezius. La VR porscha in pachet general attractiv en in ambient fidabel.
1. Paja e prestaziuns supplementaras
contract da lavur da fatschenta
svilup transparent da las pajas fin al maximum dal bindel da paja
premia da prestaziun en cas d'in giudicament sur la media en il dialog annual cun las collavuraturas ed ils collavuraturs
cassa da pensiun cun tschains sur la media e cun fitg bunas prestaziuns, vesair la pagina d'internet da la cassa da pensiun
premia da fidaivladad en furma da temp u daners
pajament cuntinuà dal salari per 2 onns en cas da malsogna e d'accident
access nunusità cun ina paja cumplaina, sustegn en cas da midada da professiun (p.ex. persunal da locomotiva, persunal da tren, manad:ra da la circulaziun dals trens)
supplements da dumengia e da notg, supplements per lavur da squadra ed indemnisaziun da pichet
abunament general 2. classa incl. bigliets per viadis gratuits a l'exteriur
abunament general 1. classa per temp da lavur a basa da confidenza
abunaments generals ed abunaments da mesa taxa pli favuraivels per commembers da la famiglia e per partenarias e partenaris da vita
telefonin pajà incl. abunament
contribuziuns da famiglia attractivas cumplementaras al supplement per uffants
2. Temp e models da lavur
temp da lavur annual: 2075 uras, temp da lavur emnil: 41.5 uras
5 emnas vacanzas, a partir da 50 onns 6 emnas, a partir da 60 onns 7 emnas
pussaivladad d'acquistar fin 2 emnas vacanzas supplementaras
congedi pajà en cas d'eveniments spezials, p.ex. nozzas, midada d'abitaziun e.u.v.
congedi da maternitad da 4 mais (per regla 1 mais avant la naschientscha e 14 emnas suenter la naschientscha), congedi da paternitad da 2 emnas
pussaivladad da prender fin 8 mais congedi nunpajà suenter il congedi da maternitad
return en la professiun suenter la maternitad: las collavuraturas han il dretg d'ina purschida da return en ina plazza parziala d'almain 50%
differents models da lavur parziala, adattads a mintga fasa da la vita ed a giavischs individuals
Work@home: pussaivel tut tenor funcziun, da princip almain 2 dis en biro e maximalmain 2 dis en il homeoffice
Work@train: pussaivel tut tenor funcziun ed en cunvegnientscha cun la persuna superiura, da princip en cas da pendular a partir da 30 minutas
3. Furmaziun e perfecziunament
grond program da perfecziunament intern per spezialistas e spezialists e per persunas da cader
purschidas da perfecziunament interdisciplinaras regularas, p.ex. «traffic public per persunas che midan sectur da lavur», «Allegra, forza da cader» e «nuggets da direcziun»
cofinanziaziun da perfecziunaments externs per il svilup professiunal e persunal
4. Sanadad e bainstar
gestiun da sanadad en il manaschi per moviment, segirezza e prevenziun
purschidas regularas da curs da sport (p.ex. tecnicas da currer, ir cun mountainbike u far passlung) e sanadad (p.ex. nutriment) sco er events communabels
passa 70 privilegis per il persunal en ils secturs da la gastronomia e da l'hotellaria, da la mobilitad, da la tecnologia, dal sport, da la sanadad e da las assicuranzas
surpigliada dals custs per la vaccinaziun cunter la grippa e cunter raischens
5. Stima e cuminanza
occurrenza da bainvegni per novas collavuraturas e novs collavuraturs
regularmain events da persunal ed occurrenzas da cader
event da sectur annual
mintga dus fin trais onns festa da fatschenta da la VR
Communablamain ed a moda fascinanta different
Bainvegni en il team da la Viafier retica!
Tar la VR na quinta betg mo quai che ti fas – mabain era co che ti ta sentas. Perquai festivain nus era communablamain ils success: cun plirs events pitschens e pli gronds durant l'onn, numerus curs e perfecziunaments. Vitiers vegnan passa 70 acziuns che ta pussibiliteschan reducziuns dal pretsch en ils secturs da la gastronomia, la mobilitad, la tecnologia u la sanadad.
Era nossas collavuraturas e noss collavuraturs organiseschan adina puspè occurrenzas, per exempel las festas da deposits popularas. Ditg curtamain: Ti na chattas tar nus betg mo in job, mabain ina rait professiunala en l'entir Grischun. Betg darar èn era sa sviluppadas amicizias da blers onns.
Nus essan qua per tai
La squadra da la resursas umanas da la Viafier retica
Nossa squadra da las resursas umanas ta sustegna gugent a moda persunala e cumpetenta, sche ti has dumondas davart plazzas libras, l'emprendissadi u l'annunzia. Nus t'accumpagnain sin la via vers tes avegnir professiunal tar la VR e procurain che ti ta sentas bain d'emprim ennà. Nus ans legrain sin tes messadi!
