La Viafier retica sa funda sin ina structura d'organisaziun che garantescha ses svilup persistent. Nossas collavuraturas e noss collavuraturs procuran mintga di che la Viafier retica restia agila e sa sviluppia vinavant.
Cussegl administrativ
Timun cun visiuns
Il cussegl administrativ maina la Viafier retica cun perspectivas strategicas. El sa cumpona da set commembras e commembers che vegnan designa:das dal chantun Grischun e da la Confederaziun ubain elegi:das da la radunanza generala.
Direcziun
La forza che fa avanzar la VR
Sin stgalim operativ maina la direcziun la Viafier retica. Il directur e las manadras ed ils manaders dals secturs da manaschi procuran che l'interpresa restia en moviment. Ils commembers da la direcziun elegia il cussegl administrativ.
Cussegl consultativ
Sustegna e fa recumandaziuns
Il cussegl consultativ fa recumandaziuns areguard il svilup architectonic, tecnic e commerzial da la VR per mauns dal cussegl administrativ. Il Cussegl grond e la Regenza dal chantun Grischun elegian mintgamai diesch commembras e commembers per ina perioda da quatter onns en il cussegl consultativ.
Secturs da manaschi
Ensemen essan nus ferms
Passa 1'800 collavuraturas e collavuraturs lavuran davant e davos las culissas per la Viafier retica. Ellas ed els procuran ch'ils trens curseschian di per di a moda fidada. Malgrà che nus essan dividids per motivs organisatorics en differents secturs da manaschi, lavurain nus maun en maun per che nossas passagieras e noss passagiers sco era nossa martganzia arrivian a moda segira ed ad uras d'in lieu a l'auter.