Rapports da persistenza

Damain gas da serra La VR vul emetter damain gas nuschaivels e proteger il mund. Per far quai construescha la VR implants solars, cumpra autos electrics e remplazza las locomotivas da diesel per reducir uschia las emissiuns da gas nuschaivels fin il 2050 sin in minimum (netto nulla).

Spargnar energia La VR ha ina strategia per duvrar pli pauca energia. Ella cumpra autos e trens che dovran pauca energia. Ulteriuras mesiras èn recuperar electricitad, stgaudar automaticamain las guntgidas e duvrar glischs da LED.

Biodiversitad La VR va tras ina bellezza regiun alpina cun bleras differentas sorts da plantas e d'animals. Per ch'era las generaziuns futuras possian giudair questa diversitad èsi fitg impurtant da proteger ella. La VR ha in plan per cumbatter plantas nuschaivlas e gida er il chantun Grischun da mantegnair la natira cun agid da la strategia da biodiversitad.

Economia circulara e rument Economia circulara munta che las materialias ed ils products vegnan adina puspè duvrads per uschia producir damain rument. La VR reciclescha materialias e producescha uschè pauc rument sco pussaivel.

Evitar polluziun Per proteger l'ambient fa la VR attenziun che nagin ieli idraulic donnegius sortia dals trens. Ils trens novs èn construids uschia ch'els èn pli favuraivels per l'ambient e che damain ieli po sortir.

Acquist persistent Sco interpresa gronda en la regiun fa la VR attenziun d'acquistar resursas a moda faira e persistenta.

Resilienza regiunala La VR retira sias resursas sche pussaivel da la regiun. Uschia vegn l'economia regiunala rinforzada e plazzas da lavur vegnan stgaffidas. Uschia resultan vias da transport pli curtas.

Prioritad da la clientella La VR vul far simpel e cumadaivel il viagiar cun la viafier per tuttas e tuts, en spezial era per passagieras e passagiers cun ina mobilitad restrenschida. Dapi il 2023 vegn la VR cussegliada davart la protecziun da las datas per garantir che las datas da la clientella, rimnadas durant la cumpra da bigliets e la surveglianza da video, sajan protegidas.

Segirezza da lavur e sanadad La VR dat gronda paisa a protecziun da la segirezza e la sanadad da las collavuraturas e dals collavuraturs. Per minimar il privel da la grevezza da la canera e l'electricitad posseda la VR in sistem da segirezza. Plinavant vegn fatg attenziun che tut las collavuraturas ed ils collavuraturs resguardian la segirezza ed absolvian regularmain scolaziuns. Era la sanadad dal persunal stat a cor a la VR. Perquai porscha ella rabats per abunaments da fitness, chapellinas da velos u acziuns sco «bike to work».

Diversitad ed egualitad da las schanzas Tar la VR han tut ils umans las medemas schanzas, independentamain dal gender, da la derivanza, la vegliadetgna, la cardientscha e l'orientaziun sexuala. La VR na tolerescha nagina discriminaziun. Cun ina strategia da diversitad focussescha la VR sin la diversitad e las differenzas d'umans, da gruppas d'umans e da las unitads da l'organisaziun.

Patruna attractiva La VR è ina da las pli grondas patrunas en il Grischun ed emploiescha glieud en divers champs ed en differents lieus. La VR porscha scolaziuns da basa per giuvenils sco er access nunusitads per tut las vegliadetgnas. Qua s'engascha la VR era per ina cumpatibilitad tranter professiun e famiglia. La VR promova la scolaziun ed il perfecziunament da sias collavuraturas e ses collavuraturs e sustegna en cas da novas pretensiuns era cun la midada da la plazza da lavur.