Per che noss trens curseschian di per di a moda fidabla tras il Grischun e transportian passagieras e passagiers sco era martganzia a moda segira d'in lieu a l'auter, dovri blera forza da lavur umana e passiun. Var 1'800 collavuraturas e collavuraturs da la Viafier retica s'engaschan en ils pli differents secturs da manaschi e lavuran maun en maun per noss success communabel.
Infrastructura
Il sectur Infrastructura mantegna e modernisescha nossas lingias da viafier e staziuns. El tgira las rodaglias, las stgomias ed ils sistems da segirezza e procura cun sia lavur che las lingias e staziuns sajan segiras durant mintga stagiun e da tutt'aura. Il focus metta el adina sin la finamira d'accordar il progress tecnic cun la particularitad istorica da las lingias e dals stabiliments.
Material rudlant
Il sectur Material rudlant è in element decisiv per la fidadadad da noss trens. El accumpogna noss trens davent da l'idea fin a l'ultim di en funcziun. En ils lavuratoris s'occupan las spezialistas ed ils spezialists dal mantegniment e da la modernisaziun da tut ils vehichels: da locomotivas a vapur sur vaguns per autos, vaguns da martganzia e vaguns panoramics fin als trens ad autotracziun ils pli moderns. Il sectur Material rudlant na procura betg mo che noss agens vehichels sajan fits per il manaschi, mabain surpiglia er incumbensas per autras viafiers.
Producziun
Cun agid da l'Infrastructura e dal Material rudlant garantescha il sectur Producziun il traffic da viafier senza incaps. El procura ch'ils trens da persunas, trens da martganzia e trens d'autos curseschian punctualmain ed a moda fidada cun avunda plazs e capacitad – oz ed en l'avegnir. El dat en il tact tant en la cabina da la locomotiva e durant las lavurs da manevrar sco era davos las culissas cun planisar e survegliar il traffic da viafier. Ed el transferescha la martganzia da la via sin las rodaglias – 365 dis ad onn.
Vendita e marketing
En il focus da noss sectur da manaschi Vendita stattan nossas passagieras e noss passagiers che derivan da l'entir mund. Qua vegnan sviluppads products fascinants e concepidas purschidas aventurusas che s'orienteschan als basegns da noss giasts e che vegnan commerzialisads en tut il mund. Il sectur da manaschi Vendita è dapertut en contact direct cun noss giasts, saja quai en l'elavuraziun dal martgà en il Giapun, la cussegliaziun a la staziun, l'accumpagnament en ils trens sco er en la purschida digitala da noss chanals online.
Finanzas
Cunquai che la Viafier retica retschaiva daners publics, vegn ella observada da tuttas varts. Il sectur da manaschi Finanzas procura ch'ils meds vegnian duvrads per l'intent previs e che las entradas ed expensas restian en equiliber. Plinavant è el responsabel per la gestiun dal material e da las immobiglias. Cun dar en locaziun immobiglias e sviluppar vinavant ils areals da las staziuns generescha il sectur entradas supplementaras.
Stab/HR
Il sectur Stab/HR sustegna tut ils auters secturs a moda fidada e cumplessiva. El recrutescha ed accumpogna il persunal, garantescha la qualitad ed il management da process ed è responsabel per la communicaziun interna ed externa. Plinavant porscha el in servetsch da clientella professiunal e s'engascha per la segirtad e la sanadad dal persunal, dals giasts sco era da las partenarias e dals partenaris da fatschenta.
Informatica e Svilup da l'interpresa
Ils champs spezials Informatica e Svilup d'interpresa èn suttamess directamain al directur. Cun in'infrastructura d'IT moderna metta l'Informatica a disposiziun basas da lavur impurtantas per tut ils secturs da manaschi e sustegna uschia il svilup digital da l'interpresa. Il Svilup da l'interpresa s'occupa da l'autra vart da l'orientaziun strategica e da la concepziun dal futur da la Viafier retica.