Las rodaglias sa stortiglian a moda grazila ed estetica tras las muntognas e las vals, ina cuntrada undrada dal Patrimoni mundial da l'UNESCO. Cun la distincziun «Viafier retica en la cuntrada da l'Alvra e dal Bernina» da l'UNESCO l'onn 2008 è l'impurtanza mundiala dals implants da viafier istorics vegnida confermada uffizialmain. La lingia da l'Alvra e dal Bernina na rendan betg mo accessibla l'Engiadin'Ota per il turissem internaziunal, mabain èn sezzas ina capodovra da l'inschigneria ed in'attracziun turistica.
La lingia da l'Alvra
Dapi passa 120 onns è la viafier da l'Alvra dapli ch'ina colliaziun da trens tranter Tusaun e San Murezzan. Lung la lingia dal Patrimoni mundial da l'UNESCO unescha la viafier da l'Alvra las culturas, ils umans e la natira. Per sia construcziun èn vegnids consultads spezialists da la tecnica da viafier ed èn vegnidas applitgadas las normas las pli progressivas da la construcziun da viafiers alpina.
La viafier da l'Alvra è vegnida realisada oriundamain sco viafier da muntogna classica per locomotivas a vapur. Ses trassé e ses edifizis construids cun craps locals èn capodovras da la construcziun da viafiers istorica. Anc oz represchentan els l'innovaziun tecnica en cuntradas impressiunantas e stattan per experientschas da viagiar particularas.
Cun la nova construcziun dal tunnel da l'Alvra procura la Viafier retica per in svilup cuntinuant ed ina ferma colliaziun tranter la tradiziun e la moderna.
La lingia dal Bernina
Dapi passa in tschientaner fascinescha la viafier dal Bernina passagieras e passagiers da l'entir mund. Ella traversa la bellezza natira svizra e collia, sco versiun innovativa da la viafier electrica interregiunala, a moda singulara la vischnanca da San Murezzan cun la citad da Tirano.
Ella è unica en l'entir mund ed in element particular dal Patrimoni mundial da l'UNESCO: La viafier dal Bernina è la transversala alpina la pli autsituada ed ina da las viafiers d'adesiun las pli stippas dal mund. En il Bernina Express pon las passagieras ed ils passagiers giudair quai cun tut ils senns: admirar in panorama impressiunant, tadlar il ramplunim da las rodas e sentir l'aria alpina sin ina da las lingias da viafier las pli innovativas da l'umanitad
Las ovras d'inschigneria
Punts che traversan autezzas snuaivlas, staziuns cun ina lung'istorgia, indrizs da regulaziun raffinads e tunnels e portals construids precisamain: Las ovras da construcziun lung la lingia dal Patrimoni mundial da l'UNESCO fan dal viadi en tren in eveniment perfetg. Il trassé, surtut sin la lingia dal Bernina, han ins tschernì uschia ch'el s'integrescha armonicamain en la cuntrada alpina.
La lingia dal Bernina e da l'Alvra collian la precisiun tecnica cun la bellezza da la cuntrada. Ovras da construcziun ed edifizis d'auta qualitad dattan dapi passa tschient onns perditga da l'inschign artisanal e mussan als giasts da tut il mund la singularitad da la Viafier retica sco part dal Patrimoni mundial da l'UNESCO.
Extracts da las chartas
Per telechargiar