La natira e la tecnica en perfetga armonia
Las lingias da la Viafier retica èn dapli che mo rodaglias: Ellas èn ina capodovra da la tecnica d'inschigneria e represchentan in'armonia perfetga tranter l'uman e la natira. Sin la lingia dal Patrimoni mundial da l'UNESCO sa stortiglian ils trens tras ina cuntrada autalpina fascinanta e porschan a las passagieras ed als passagiers experientschas impressiunantas cun in confort maximal.
Quest'armonia dals elements n'è betg ina casualitad: Grazia ad ina planisaziun perspicazia ed ad ina cumbinaziun raffinada d'innovaziuns tecnicas da las generaziuns passadas, actualas e futuras reussescha in'integraziun perfetga da la tecnica en la cuntrada. Questa attaschadadad a la patria ed a la natira caracterisescha la Viafier retica dapi il 1889.
Ultra da las lingias da viafier sezzas fa perquai era la cuntrada circumdanta part dal Patrimoni mundial da l'UNESCO «La Viafier retica en la cuntrada da l'Alvra e dal Bernina». I vegn differenzià tranter trais zonas da plimatsch differentas.
Extracts da las chartas
per telechargiar
Planisar cuminaivlamain per il patrimoni mundial
Mussavia per la planisaziun e construcziun d'auta qualitad en il perimeter da l'UNESCO
Il mussavia per la planisaziun e la construcziun d'auta qualitad en la cuntrada dal Patrimoni mundial da l'UNESCO Viafier retica sa drizza a planisad:ras, autoritads, purtad:ras da decisiun ed ad ina vasta publicitad. Nossa finamira èsi da rinforzar la conscienza per la valur extraordinaria da questa cuntrada culturala unica ed a medem temp da crear ina basa per projects da construcziun realisads cun responsabladad ed in bun sensori per la cuntrada da l'UNESCO.
La publicaziun mussa co ch'ins po coordinar a moda raschunaivla ils differents interess en la procedura da planisaziun e da lubientscha. Vitiers vegnan instruments e recumandaziuns d'agir concret:as che pussibiliteschan in svilup persistent en accord cun la protecziun dal patrimoni mundial. In mussavia per tut las persunas che gidan a concepir l'avegnir da questa cuntrada ferroviara!
Planisar e bajegiar en il perimeter UNESCO
per telechargiar