La Viafier retica en la cuntrada da l'Alvra e dal Bernina è dapi il 2008 sin la glista dal Patrimoni mundial da l'UNESCO – sco ina da las viafiers da muntogna las pli spectacularas dal mund. Ils viaducts e tunnels impressiunants e la bellezza cuntrada alpina dal Grischun fan dal viadi in'experientscha unica.
Ma il patrimoni mundial sveglia dapli che mo smirvegl: Davos las culissas s'engascha l'Uniun dal Patrimoni mundial VR per il mantegniment dals implants da viafier, ils projects per intermediar savida portan la cultura ferroviara en scolas e sin excursiuns e la World Heritage Experience Switzerland collia la Viafier retica cun auters bains dal Patrimoni mundial da l'UNESCO en Svizra ed en l'entir mund.
Far vacanzas en in edifizi istoric ad Alvagni
Il mund d'eveniments da la Viafier retica cumpiglia dapli che mo rodaglias: Elements particulars sco centers da vitgs istorics, ensembles, edifizis ed implants singuls, vias da traffic istoricas e las ovras da construcziun unicas da nossas lingias da viafier cumpletteschan la purschida turistica. Quests bains istorics che fan part dal patrimoni cultural vegnan rendids accessibels a tuttas e tuts.
L'abitaziun da vacanzas en la staziun d'Alvagni permetta da reviver muments istorics. Là, nua ch'ins ha beneventà e dà adia a numerus giasts dal 1903 fin ils onns 1980 e transportà rauba lung la lingia da l'Alvra, han ins transfurmà l'abitaziun dal chau-staziun en il plaun sura en in'abitaziun da vacanzas per fin a tschintg persunas, quai en cooperaziun cun la Fundaziun Vacanzas en edifizis istorics e cun la Tgira da monuments dal Grischun.
L'abitaziun da vacanzas pon ins reservar sur la plattafurma da la Fundaziun Vacanzas en edifizis istorics:
