Staziun da Glion

Renovaziun cumplessiva dal 2016 fin il 2018

La Viafier retica modernisescha fin la midada da l'urari il december 2018 la staziun da Glion per totalmain 30 milliuns francs. La nova staziun vegn ad esser moderna, tenor ils basegns da persunas cun impediments e favuraivla a la clientella, pia ina staziun che ademplescha cumplettamain la funcziun d'in center da traffic public. La staziun da Glion è il punct da midar il pli impurtant dal traffic public en Surselva. Ella vegn duvrada mintga di da var 2000 persunas che midan dals autos da posta sin la VR u viceversa.

Cun la renovaziun cumplessiva da la staziun da Glion vegnan las cundiziuns dad ir en il tren meglieradas marcantamain. Il project prevesa ina staziun cun in perrun da chasa ed in perrun d'amez. L'access al perrun d'amez succeda tras in nov sutpassadi che pussibilitescha l'access era a persunas cun mobilitad limitada. Plinavant collia il sutpassadi per persunas il center da Glion cun la vart dal Rain. Per il traffic da tren stattan a disposiziun en l'avegnir quatter binaris.

Ils implants da staziun antiquads vegnan medemamain renovads e modernisads. L'edifizi da la staziun vegn colurà da nov ed il deposit da tancs dad ieli e da diesel vegn renovà. L'entira regulaziun da la tecnica da viafier al lieu vegn dischlocada en in nov edifizi da tecnica sin la vart dal Rain. Ils collavuraturs dal servetsch da viafier da la VR survegnan ultra da quai localitads da biro e gardarobas modernas.

Optimà grazia ad ina reorganisaziun
Durant decennis han ins chargià ils vaguns da vitgira a la staziun da Glion. Cunzunt la chargiada da laina a la via da la staziun ha savens chaschunà per gronda truscha. Il medem mument ha era stuì funcziunar il traffic da persunas, quai che n'è betg adina sta agreabel per ils passagiers. Ils davos onns han ins reorganisà successivamain la situaziun: per distgargiar la via da la staziun han ins en in emprim pass dischlocà la chargiada da laina a Rueun. Pli tard ha la Viafier retica construì a Schnaus in nov terminal da traffic da martganzia per containers da stgomi, cun ils quals ins ha pudì transferir directamain ina gronda part dal traffic da martganzia. Cun modernisar la circulaziun da persunas pon ins ussa prender per mauns la davosa etappa da construcziun ch'è la pli impurtanta per ils passagiers. Suenter l'extensiun e renovaziun daventa la staziun da Glion ina vaira staziun da persunas cun in binari supplementar per cumponer ils trens da vitgira – ina soluziun optimala per la populaziun da Glion.

Utilisaziun communabla da l'areal da la staziun
Cun la renovaziun da la staziun stgaffesch'ins era bunas cundiziuns generalas per l'ulteriura utilisaziun da l'areal da la staziun. Ensemen cun la vischnanca dad Ilanz/Glion ed AutoDaPosta Grischun optimesch'ins era vinavant il concept da traffic. Ins dat en spezial paisa ad ina buna relaziun da midada da la VR a l'auto da posta e viceversa. Per ina purschida da Park + Rail favuraivla a la clientella stattan er en l'avegnir a disposiziun avunda parcadis.