Interrupziun cumpletta in Engiadina Bassa

dals 11 marz fin als 7 settember 2019

Ils tunnels da Giarsun e da Magnacun da la lingia da la Viafier retica ston gnir sanats fundamentalmaing, uschè chi'd es necessari da serrar il traget per ün mez on. Perquai as serra dals 11 marz fin als 7 settember 2019 il traget tanter Lavin e Scuol-Tarasp pel trafic da viafier. La Viafier retica nüzzaja quist temp chi’d es interruot la viafier per realisar efficiaintamaing ulteriurs progets e per spargnar cuosts da fabrica. Dürant quists ses mais circuleschan bus chi rimplazzan il tren in Engiadina Bassa.

1. Staziun da müdar tren, Sagliains
Per realisar il concept da spüertas futuras sco eir per optimar la punctualità, la stabilità da l'urari e la sgürezza, esa necessari d'adattar il transport d'autos cul tren e la staziun da Sagliains. La staziun ingio chi’s sto müdar tren, vain renovada tenor ils bsögns da persunas cun impedimaints e cun la reconstrucziun as separa il trafic da persunas dal transport d'autos cul tren.

Cuosts da proget: CHF 29.8 miu.
Avertüra: settember 2019

2. Staziun da Lavin
La staziun da Lavin vain fabrichada oura tenor ils bsögns da persunas cun impedimaints ed eir modernisada. I‘s construischa ün implant da perrun extern sco eir ün nouv suotpassagi per persunas cun ün'entrada aviond üna rampa ed üna s-chala suot tet. Eir l'indriz da sgürezza as renovescha per pussibiltar in avegnir a Lavin l'arrivada da duos trens a listess mumaint.

Cuosts da proget: CHF 10 miu.
Avertüra: december 2019
Lavurs sün la plazza da staziun fin in mai 2020

3. Sanaziun dal viaduct da Val Tuoi
Il viaduct da Val Tuoi es ün dals plü gronds fabricats da punts da la VR, gnü construi avant 106 ons. Intant cha’l traget da la viafier resta serrà, as faja las lavurs da reparaziun per mantegner il viaduct. Cun quai cha dürant quel temp chi’d es interruot il traget nu circuleschan ingüns trens, nu faja dabsögn d'üna punt auxiliara, uschè chi's po spargnar cuosts. La müraglia vain mantgnüda cumplettamaing, quai chi correspuonda a las pretaisas da la chüra da monumaints.

Cuosts da proget: CHF 3 miu.
Avertüra: settember 2019

4. Renovaziun da la surstructura da la staziun da Guarda

La surstructura, dimena il let da binaris e'ls binaris da la staziun da Guarda, as renovescha dürant cha’l traget da la viafier es interruot La construcziun veglia dals binaris vain disfatta, ils indrizs a cabel vegnan sanats, traversas, s-chamgias e nouvs binaris vegnan installats e francats cun crappella.

Cuosts da proget: CHF 1.2 miu.
Avertüra: settember 2019

5. Reparaziun dal tunnel da Giarsun e dal tunnel da Magnacun

Ils tunnels da Giarsun e Magnacun tanter Guarda ed Ardez as rechattan in üna zona geologica pretensiusa. Daspö l'avertüra dal traget l'on 1913 han perquai stuvü gnir sanats ils tunnels plüssas jadas. Cun quai cha la costa a l’otezza dal tunnel as mouva per 10 millimeters l'on, esa necessari da far lavurs da sanaziun extaisas. Las masüras da construcziun vi da quists duos tunnels pretendan chi’s serra cumplettamaing e per ses mais il traget da Sagliains – Scuol-Tarasp.

Cuosts da proget: CHF 44 miu.
Avertüra: tunnels 2020 e traget liber 2021

6. Rimplazzamaint dals binaris i'l tunnel da Tasna
Il profil da las aschinas dals binaris i'l tunnel da Tasna es üsà e marcà da fouras in lös chi guotta permanentamaing e dad otras foppas. Intant cha’l traget es serrà, as rimplazza las aschinas üsadas e las fixaziuns in tuot il tunnel.

Cuosts da proget: CHF 300 000
Avertüra: settember 2019

Renovaziun dal convertider a Bever
Cul convertider a Bever as proveda l'intera rait da basa da la VR cun energia da tracziun. Il convertider static es in funcziun daspö il 2004 ed es vieplü suottapost a disturbis. Per pudair garantir sco fin uossa la sgürezza dal provedimaint d'energia, vain l'implant adattà a la plü nouva tecnologia. Siond cha la revisiun ha lö dürant cha’l traget resta serrà, as poja far las lavurs al lö e cun quai as spargna cuosts.

Cuosts da proget: CHF 1.5 miu.
Missa in funcziun: gün 2019

Ulteriuras lavurs da mantegnimaint vi da mürs da sustegn e lavurs da taglialaina

Dürant l'interrupziun dal traget as faja differentas lavurs da mantegnimaint e da taglialaina illa regiun da l'Engiadina Bassa.

Substituziun da tren

Trafic da persunas
Ils viagiaturs da e per l'Engiadina Bassa vegnan manats a la staziun da Susch. Tanter Susch e Scuol-Tarasp circuleschan bus directs da l'AutoDaPosta Grischun. Lavin (Volg), Guarda (Giarsun) ed Ardez sun accessibels cun bus davent da las staziuns da Susch e Scuol-Tarasp. La staziun da Ftan Baraigla nun es disponibla dürant l’interrupziun dal traget. Ils trens da l'Engiadina circuleschan tuots fin/davent da Samedan. Tanter Samedan e Puntraschigna as poja ir cun ün tren pendular da shuttle. Las colliaziuns directas existentas tanter Landquart e San Murezzan nu sun pertoccas. Las uras da partenza exactas dals bus chi rimplazzan il tren vegnan comunichadas in tuot ils uraris a partir da la müdada d'urari in december 2018. Nus ingrazchain ad Ellas/Els per Lur incletta demuossada.

Transport d'autos cul tren tras il Vereina
Il transport d'autos cul tren tras il Vereina nun es pertoc da las lavurs da fabrica. L'urari dals transports d'auto cul tren chattan Ellas/Els sülla pagina www.rhb.ch/vereina.

Viafier da marchanzia Grischun
Pels cliaints da transport da la Viafier da marchanzia Grischun as spordscha dürant l'interrupziun dal traget üna pussibiltà alternativa da trans-charg a la staziun da Zernez. Davent da là as regla ils transports sün via. Per ulteriuras infuormaziuns as drizzais Vus per plaschair a Vos manager da prodots o contactais buendner-gueterbahn(at)rhb.ch.