Purtret da l‘interpresa

La VR sin in‘egliada

La Viafier retica è ina interpresa da grondas prestaziuns sin il sectur dal traffic da temp liber, da pendulari e da martganzia. Cun ses trajects da muntogna singulars, il patrimoni mundial UNESCO, il Glacier Express ed il Bernina Express garantescha ella dapi il 1889 per eveniments da tren fascinants a travers il Grischun.

Quai che ha entschavì il 1889 cun l’avertura dal traject da Landquart a Claustra è oz ina rait da lingias da 384 km enamez l’auta muntogna svizra. Sin l’iniziativa da l’Ollandais Willem-Jan Holsboer han fundà ils piuniers lezza giada la viafier a binaris stretgs Landquart-Tavau SA. Già il 1890 circulavan ils emprims trens a Tavau, pli tard a San Murezzan, Mustér e Scuol. Tras la fusiun cun las viafiers d’Arosa e dal Bernina s’augmentava la rait da lingias da la Viafier retica. Il davos augment da la rait è succedì il 1999 cun il tunnel dal Vereina.

Glacier Express auf dem Landwasserviadukt.
Bernina Express auf dem Kreisviadukt Brusio.

Integradas armonicamain en la natira selvadia, contribueschan las lingias da viafier e las construcziuns d’art a l’attracziun dal Grischun. Las lingias da l’Alvra e dal Bernina tranter Tusaun, San Murezzan e Tirano èn capodovras da la tecnica da viafier. Dapi il 2008 tutgan ellas tar il patrimoni mundial UNESCO. Cun il Bernina Express ed il Glacier Express dispona la Viafier Retica da marcas cun renum mundial.

La pli gronda viafier da las Alps da la Svizra transporta oz cun circa 1 500 collavuraturs mintg’onn passa 2 milliuns pendularis, 8 milliuns turists e dapli che 500 000 tonnas martganzia.

La Viafier retica en cifras

  • 182 000 000 frs. investescha la VR annualmain en sia infrastructura
  • 10 000 000 giasts viagian mintg’onn cun la VR
  • 670 000 tonnas martganzia vegnan transportadas annualmain da la VR
  • 464 000 vehichels  circuleschan annualmain tras il Vereina
  • 100 000 viadis da camiuns scrodan mintg’onn grazia al traffic da martganzia da la VR
  • 19 042 meters lunghezza mesira il pli lung tunnel (Vereina)
  • 1 500 collavuraturs procuran per eveniments fascinants
  • La VR va sur 616 punts
  • La VR passa tras 115 tunnels
  • La VR passa tar 103 staziuns
  • 100 % forza idraulica grischuna mettan en moviment ils trens electrics da la VR
  • 89 meters autezza mesira il pli aut viaduct (viaduct da Wiesen)
  • 70 ‰ importa la pli gronda pendenza (lingia dal Bernina)
  • 30 % dal traject da la VR sa chattan sur 1 500 m s.m.
  • 30 % dal traject da la VR èn patrimoni mundial UNESCO
  • 20 % dal traject da la VR sa chattan sur u in construcziuns d’art