Furma giuridica ed acziunariat

En il maun da chantun e confederaziun

La Viafier Retica SA è ina societad d’aczias da dretg privat tenor artitgel 620 ss. dal dretg d’obligaziuns svizzer (DO). Acziunaris principals èn il chantun Grischun e la confederaziun svizra.

L’intent e l’organisaziun da la societad èn fixads en ils statuts da la Viafier Retica. La lescha federala da viafier (Lviafier) fixescha la reglamentaziun davart l’organisaziun e la contabilitad. En questa lescha federala ed en la lescha davart il traffic public en il chantun Grischun sa chatta er la basa legala per conceder contribuziuns da gestiun e d’investiziun a la Viafier retica.

Il chapital d’aczias munta a CHF 57 957 000 ed è repartì en 7 394 aczias ordinarias cun ina valur nominala da mintgamai CHF 500 e 108 520 aczias da prioritad cun ina valur nominala da mintgamai CHF 500. Tut las aczias èn al num ed èn liberadas cumplettamain. Mintga aczia ha il dretg d’ina vusch a la radunanza generala. I na dat naginas restricziuns en quai che reguarda la transmissibladad da las aczias da la Viafier retica.

L’acziunariat sa cumpona sequentamain:

51,3 %: Chantun Grischun

43,1 %: Confederaziun

  1,0 %: Vischnancas grischunas

  4,6 %: Privats / Interpresas

Radunanza generala
La radunanza generala è l’organ suprem da la societad. Ella ha lieu per regla ina giada l’onn entaifer sis mais suenter la terminaziun da l’onn da fatschenta. Il termin d’invid munta a 20 dis. Organs da publicaziun èn il Fegl uffizial svizzer da commerzi ed il Fegl uffizial dal chantun Grischun. Las incumbensas e cumpetenzas da la radunanza generala sco er ils dretgs da cundecisiun dals acziunaris èn reglads en ils statuts.

La proxima radunanza generala ha lieu venderdi, ils 7 da zercladur 2019, a Claustra.

Documents

Statuts da la Viafier retica SA (VR) (tudestg)

Rapport annual 2017 (tudestg) / E-Paper (tudestg)