Champs commerzials

Ensemen essan nus ferms

Cun 1 500 collavuraturas e collavuraturs procurain nus per ina circulaziun exacta da noss trens, mintga di, durant mintga stagiun. Cumbain che nus essan repartids organisatoricamain en differentas partiziuns, collavurain nus maun en maun, sinaquai che noss passagiers e nossa martganzia arrivian segirs e punctuals a lur destinaziun. Communablamain furmain nus la basa per la qualitad e per il success da la Viafier retica.

La partiziun «Infrastructura» mantegna e modernisescha noss trajects da viafier e las staziuns. Ella ha quità dals binaris, da las stgomias, dals sistems da segirezza e procura per ina utilisaziun segira dals trajects e da las staziuns, durant tut las stagiuns e da tutt’aura. En il focus stat adina il giavisch dad accordar ils progress tecnics cun la singularitad istorica dals trajects ed edifizis. 

Quai è ina sfida ch’è er enconuschenta a la partiziun «Material rudlant». Ella ha quità da noss vehichels, a partir da l’idea fin a l’ultim di da servetsch. En ils lavuratoris s’occupan ils spezialists dal mantegniment e da la modernisaziun da tut ils vehichels. Da locomotivas a vapur sur vaguns per transportar autos u martganzia e vaguns panoramics fin als trens ad autotracziun ils pli moderns. La partiziun «Material rudlant» na fa betg sulettamain fit per il traffic noss agens vehichels, ella realisescha er incumbensas per autras viafiers. 

A basa da l’infrastructura e dal material rudlant garantescha la partiziun «Producziun» il traffic da viafier senza incaps. Ella procura per ina circulaziun punctuala e fidada dals trens da persunas, da martganzia e da transport d’autos, cun plazs e capacitads avunda - oz ed er en il futur. Ella dat en il tact en la cabina da manischunz e durant il manevrar, ma medemmamain davos las culissas tar la planisaziun e la surveglianza dal traffic da viafier. Ed ella maina la martganzia da la via sin ils binaris. Durant 365 dis l’onn.

I n’è betg la martganzia che stat en il focus da la partiziun «Vendita», mabain noss passagiers or da l’entir mund. Qua vegnan sviluppads products fascinants e purschidas che vegnan concepids tenor ils basegns differents da noss giasts e che vegnan commerzialisads en l’entir mund. N’emporta nagut sche quai sa tracta da l’elavuraziun dal martgà en il Giapun, da la cussegliaziun a la staziun, da l’accumpagnament en ils trens u dals chanals online en il mund digital, la partiziun «Vendita» stat adina en il contact direct cun noss giasts.

Tar questas numerusas activitads èsi impurtant che las entradas e sortidas sajan equilibradas. Quai è l’incumbensa da la partiziun «Finanzas» ch’è respunsabla, ultra dals aspects finanzials, er per la gestiun dal material, l’informatica e las immobiglias da la Viafier retica. Cun ina infrastructura IT moderna e cun soluziuns tecnicamain perfecziunadas creescha ella in fundament da lavur impurtant. Tras la locaziun d’immobiglias e l’ulteriur svilup d’areals da staziun procura ella per ulteriuras entradas

Ina chaussa è communabla a tut questas partiziuns. Ellas dastgan far quint cun il sustegn da la partiziun «Stab/RU». Funcziuns interdisciplinaras impurtantas procuran per la recrutaziun e l’assistenza da collavuraturs, la garanzia da la qualitad, la communicaziun interna ed externa sco er per la segirezza e la sanadad da collavuraturs, giasts e partenaris da fatschenta. Cun la partiziun «Svilup da l’interpresa» disponin nus ultra da quai da spezialists che han quità da l’avegnir da la Viafier retica e che dirigian ad uras las decisiuns impurtantas e las planisaziuns en la gista direcziun, uschia che noss trens vegnan a transportar er en il futur da maniera segira e fidada Vus persunalmain, Voss auto u Vossa martganzia.